Tres les movilizaciones de los últimos meses, qu’algamaron elevaos porcentaxes de siguimientu nel sector, especialmente na xornada de fuelga del 6 d’ochobre, les trabayadores vense obligaes de nuevo a convocar otra fuelga’l 28 de payares ante la negativa de la patronal a ceder y negociar.

Les reivindicaciones principales siguen vixentes: subida salarial (una y bones l’actual apenes llega al salariu mínimu) y cumplimientu de les concreciones horaries pa respetar descansos y conciliación, amás de cuestiones comunes a gran parte del mercáu llaboral: evitar la precariedá de les plantiyes, la sustitución de trabayadores fixos con contratos estables por emplegaos de ETTs y combatir los despidos por cuenta de la estinción antemanada del contratu por previsión d’amenorgamientu del volume de la campaña.

Pela so parte, la patronal caltien secuestrada la negociación con cuenta de precarizar entá más les nueses vides y perpetuar les nueses condiciones actuales: flexibilidá llaboral, temporalidá, xornaes parciales, salarios míseros, oxetivos inalcanzables, despidos por nun asitiar el productu d’una vez, etc.
Una vegada más, dende la UJCE vamos sofitar y vamos trabayar por que esta nueva xornada de fuelga sía un ésitu pa les trabayadores del sector del telemarketing, que les sos empreses nun dexaron de ver aumentar los sos beneficios. Nun podemos quedanos paraes y resignanos a qu’estos beneficios sían a cuenta de la nuesa precariedá.

Facemos tamién un llamamientu a otros sectores de teleoperadores ya encuestadores, que nun se circunscriben a esti conveniu en particular, p’animales a reclamar tamién los sos intereses; gran parte de les reivindicaciones de les plantiyes de telemarketing son similares a les suyes, pero llamentablemente con peores condiciones.

L’exemplu que tán dando les plantiyes de los contact center ye un perfectu puntu de partida pa sacar a la lluz les pésimes condiciones llaborales y vitales de sectores tradicionalmente invisibilizados, altamente feminizados y con plantiyes bien nueves.

Siguimos lluchando por un conveniu dignu.

¡Colgamos los cascos de nuevo!

15129071_10155476609393136_1292925255132097430_o