Comunicáu escontra l’apertura en domingos y festivos

Dende la Mocedá Comunista Asturies queremos amosar el nuesu refugu ante l’apertura de los grandes centros comerciales nos díes festivos, una midida que nun ye sinón un retayu más de los derechos llograos pola clas trabayadora a lo llargo de años.

 Tenemos qu’entender que, como consumiores, tenemos la responsabilidá de nun acudir a los centros comerciales nos domingos y festivos, poniéndomos asina escontra d’una midida inxusta, que perxudica a miles de trabayadores a lo llargo de tol Estáu.

 Esta midida inxusta non sólo restrinxe’l derechu al descansu, sinón qu’impide a les trabayadores compaxinar la vida llaboral y familiar. Amás, de forma contraria a lo que se venía diciendo, l’apertura de domingos y festivos nun contribuye a la creación de más puestos de trabayu, sinón que la patronal reaxusta los horarios pa cubrir la sobrecarga de trabayu cola plantía que yá tien.

 Finalmente, un aspeutu que nun podemos escaecer, ye la destrucción del pequeñu comerciu de los nuesos barrios. Lleis como esta contribuyen a eliminar progresivamente el pequeñu comerciu, que ye incapaz de competir escontra los oligopolios, destruyendo d’esta manera la vida de los nuesos barrios y contribuyendo a l’acumulación de capital en manes de los grandes comercios.

 Entendemos polo tanto, que la protesta ye’l único camín, yá que la mocedá ta fartuca de la precariedá llaboral que sufrimos les trabayadores y que mos impide desarrollar un proyeutu de vida, yá que tamos sometíes a les empreses, que namás piensen en multiplicar los sos beneficios, llevándomos a unes condiciones llaborales de semiesclavitú.

 Por too esto, la Mocedá Comunista n’Asturies solidarizámonos con esta llucha y facemos un llamamientu al conxuntu de consumidores, pa que nun acudan a comprar nos domingos y festivos. Ye’l momentu de dar un pasu al frente y demostrar a la patronal que la clas obrera organizada namás pue vencer

¡ESCONTRA LA ESPLOTACIÓN LLABORAL, NUN COMPRES EN DOMINGOS Y FESTIVOS!

cartel-obreras-moceda-corregido